Auðvitað er það forgangsatriði að hækka laun forseta ASÍ

Ég las í frétt á Eyjunni áðan að Gylfi nokkur Arnbjörnsson er nú bara með "þokkaleg laun" eins og það var orðað. Þokkaleg laun er nú ekki nema eins og ein milla á mánuði. Þetta er náttúrulega algjör skandall og alveg skammarlega lág laun. Jú ég meina það karlinn er nú einu sinni forseti, þó það sé forseti ASÍ.

Það hefur líka komið fram að hann vinnur alveg ógeðslega mikið og hann ber alveg geðveikislega mikla ábyrgð og hann vaknar örugglega snemma á morgnana og fer örugglega seint að sofa á kvöldinn af því að  hann er alltaf að hugsa um verkalýðinn. Ég veit bara ekki hvar launafólk væri statt ef hann væri ekki til. Og ég veit að þetta er alveg rosalega erfitt starf. Hann þarf t.d. að halda ræðu fyrir fólk sem er með hávaða, og púar á hann  þegar hann er að reyna að segja því hvað hann og samtökin hans ASÍ eru æðisleg. Svo þarf hann líka að bjóðast til að fresta launahækkunum umsamdra kjarasamninga sem launafólk ætti bara að sjá að er algjör snilld í verkalýðsbaráttu.

Það er náttúrulega ekki hver sem er sem getur unnið svona starf. Og auðvitað þarf hann hærri laun fyrir þetta álag, elsku karlinn á "þokkalegu laununum".

Þannig að auðvitað ættum við að hefja söfnun fyrir svona duglegan mann. Við gætum kannski byrjað strax á mánudaginn fyrir utan húsnæði Vinnumálastofnunar. Þessir atvinnleysingjar hafa ekkert með allan þennan pening að gera sem þeir fá í bætur.

JB

Hvaða máli skiptir hamingjan í nútímasamfélagi?

Það hefur komið í ljós undafarnar vikur og mánuði að sífellt fleiri velta fyrir sér hver hlutur hamingjunnar sé i því samfélagsástandi sem við búum við um þessar mundir. Í góðærinu voru svo margir uppteknir við að "meika það" og "græða" fyrir utan það að hálfdrepa sig í vinnu, innkaupum, utanlandsferðum og húsbyggingum að enginn mátti vera að því að staldra við og spá i hver hlutur hamingjunnar væri í þessu öllu saman.

En nú eru breyttir tímar. Ég ætla ekki að gera lítið úr þeim vanda sem margir eiga í en það jákvæða sem fylgir nútímanum er að æ fleiri hafa farið að sýna því áhuga að hugsa um og rökræða hlut hamingjunnar í lífi sínu. Þannig hef ég haldið tvö erindi um hamingjuna undanfarið. Annar var um hamingju barna og hlut skóla í að stuðla að hamingju nemenda sinna og hinn var haldinn á fundi aðstandenda geðsjúkra.

Næstkomandi mánudag, 20. apríl ræði ég hamingjuna hjá Vinstrihreyfingunni grænu framboði á Suðurnesjum í Keflavík og leita svara við þeirri spurningu hvaða máli hamingjna skipti í nútímasamfélagi.

Allir sem áhuga hafa á hamingjunni eru velkomnir á meðan húsrúm leyfir en fundurinn verður haldin að Hafnargötu 36a og hefst kl. 20.

JB

Hringjarinn frá Bústöðum í miklu stuði

Ég verð að byrja á að viðurkenna það að í gærkvöldi gerði ég hörmuleg mistök. Mistökin uppgötvaði ég þó ekki fyrr en snemma í morgun. Ég nefnilega steingleymdi að setja eyrnatappa í eyrun áður en ég fór að sofa í gærkvöldi vegna þess að ég hafði steinglymt að í dag er páskadagur. Dýrkeypt mistök en svona er sagan:

Ég svaf ágætlega í nótt og ég hélt að ég væri í miðjum draumi á ævintýrinu um hringjarann frá Notre Dame þegar mér fannst þessi draumur vera full raunverulegur til þess að vera venjulegur draumur. Hringjarinn í Notre Dame ætlaði bara alls ekki að hætta að hringja bjöllunum þegar ég áttaði mig á því að mig var ekki lengur að dreyma, þessi klukknahávaði var raunverulegur og mér fannst eins og ég lægi undir bjöllu. Ég leit á klukkuna sem var .07.30 "æ helv." hugsaði ég það hlaut að vera einhver svona Jesúdagur í dag, fyrst Pálmi skíðapresturinn í Bústöðum var farinn að hringja bjöllum sem eru bara örfáa metra frá rúminu mínu. Hvað skyldi Jesú hafa verið að bralla prakkarinn sá fyrir 2000 árum fyrst að Pálmi sá ástæðu til að rífa sig á lappir og fara að hringja bjöllum rétt eins og heimsstyrjöld væri skollin á? Jú var prakkarinn ekki í einhverjum sjónhverfingum á þessum degi eða hvað, aflraunum, lyfta einhverjum steini eða æ ég man það ekki. Það skiptir ekki máli. Það sem skiptir máli er að séra Pálmi var í ægilegu stuði og glumdu bjöllurnar í um 5 mín.

Jæja ég var að festa svefn aftur þegar bjöllurnar fóru aftur af stað. Ha og nú voru bara 10 mínútur liðnar síðan Pálmi slökkti á þeim og klukkan orðin 07.45. Ég neitaði að láta rífa mig upp úr rúminu með þessum hætti. Ég hafði ætlað að sofa til kl. 10, en séran Pálmi var greinilega á öðru máli.

Og enn og aftur jæja ég var aftur að festa svefn þegar bjöllurnar fóru aftur í gang og nú í þriðja sinn á sama hálftímanum og nú var klukkan 08.00. Og ég var ansi krumpaður í framan þar sem ég reyndi að setja kodda yfir eyrun. Djöfull er karlinn ofvirkur á þessum kirkjuklukkum.

Eftir fimm mínútna djöfulgang í viðbót fékk ég næstum því klukkustundar hvíld, en var samt orðinn ansi kvekktur á þessu og átti alltaf von á að einhver bjallan færi af stað. Ég reyndi að telja mér trú um að nú væri þessu lokið og ég gæti tekið það  rólega. Viti menn klukkan var að verða 09.00 og þá byrjar þetta aftur. Hvað nú? Jú auðvitað það þarf að hringja bjöllunum líka þegar messan er búin til að fólk viti að allt sé búið og nú megi það drífa sig heim.

"Ég held að sérann sé búinn að takast ætlunarverk sitt með að koma mér á fætur" hugsaði ég með mér enda þorði ég ekki að loka augunum aftur orðinn skíthræddur um að Pálmi væri með njósnamyndavél í svefnherberginu mínu og léti klukkurnar í gang þegar hann sæi að ég væri að festa svefn, prakkarinn sá.

Og ég hef ekkert sofið meira í dag, en hinsvegar hef ég verið að velta vöngum yfir því hvort séra Pálmi sem á kirkjubjöllur við hliðina á rúminu mínu svo að segja hafi einhvern tíma haldið kristilega hugvekju um tillitsemi?

JB

Margur verður af aurum api. Siðfræðinámskeið fyrir sjálfstæðismenn.

Rætt hefur verið um það við mig í dag hvort ekki sé  kominn tími til að bjóða upp á siðfræðinámskeiðið Margur verður af aurum api, siðfræðinámskeið fyrir sjálfstæðismenn. Ég hef nefnilega verið að kenna starfstengda siðfræði undanfarin ár, s.s. siðfræði fyrir starfsfólk á leikskólum og á geðsviði Landspítalans. Svo má náttúrulega ekki gleyma því að árið 2007 bauð ég upp á námskeiðið Hversu mikið er nóg, siðfræðinámskeið fyrir bankastjóra og í vetur bauð ég upp á siðfræðinámskeiðið Siðfræði handa Gunnari, siðfræði fyrir forystufólk í stéttarfélögum.

Starfsfólk á leikskólum og á geðsviði hefur verið duglegt við að mæta en því miður skráði sig enginn bankastjóri árið 2007 og enginn frá stéttarfélögunum í vetur. Ég veit því ekki hvort ég nenni að halda svona námskeið núna, en ef ykkur ágætu sjálfstæðismenn langar ógeðslega mikið að taka námskeiðið Margur verður af aurum api, siðfræðinámskeið fyrir sjálfstæðismenn þá gæti ég svo sem látið til leiðast.

Endilega sendið mér línu ef ykkur langar mjög.

JB

Framhaldið í höndum formannsins

Þannig mismuna borgaryfirvöld þegnum sínum

Í Velvakanda Morgunblaðsins í dag á bls. 41 er grein þar sem m.a. er sagt frá þvi hvernig borgaryfivöld láta sig ekki muna um að fella niður 17 milljóna skuld eins félags í borginni á meðan annað sem sótti um 200.000 kr styrk eða svo fær kr. 0. Kíkjum á brot úr greininni:

" Svo finnst mér hneykslanlegt að þau börn sem ætla að láta ferma sig á borgaralegan hátt fái engan styrk í ár. Samtökin Siðmennt, sem sjá um þessa athöfn og halda frábær námskeið, hafa fengið styrk undafarin ár en fá hann ekki í ár. Í þessum skrifuðu orðum er verið að fella niður skuld hjá ágætri kirkju um 17 milljónir, á meðan er Siðmennt hafnað um styrk. Hvar er jafnræði gagnvart börnum? Í lokin ætla ég að vekja athygli á því að sum þessara fermingarbarna eiga litla sem enga fjölskyldu og koma frá efnalitlum fjölskyldum."

En þess má geta að sá styrkur sem um ræðir til Siðmenntar hefur verið veittur árin 2006-2008 til þess að greiða niður húsaleigu vegna undirbúningsnámskeiða og athafna borgaralegrar fermingar. Þessi styrkur borgarinnar hefur því runnið beint til fjölskyldna þátttakenda til að lækka þann kostnað sem í fermingarstússinu felst.

En núverandi borgaryfirvöld hafa semsagt ekki efni á að styðja við þær rúmlegu 100 fjölskyldur sem taka þátt í borgaralegum femingum með um 1500-2000 króna framlagi á fjölskyldu til þess að lækka húsaleigu á aðstöðu fyrir námskeið og athafnir, en hafa efni á að punga 17 millum í ríkiskirkjuna sem fær endalausa peninga frá ríki og borg og kann greinilega ekki að fara með þá.

Ef þetta er ekki bruðl þá veit ég ekki hvað.

JB

Dapurt í landi skoðanafrelsis?

 Kjartan nokkur Jónsson prestur flutti pistil í Hafnarfjarðarkirkju þann 22. mars s.l. þar sem hann greindi frá sorg sinni yfir félaginu Siðmennt.

"Það er því dapurt hve mikinn hljómgrunn lítil samtök eins og Siðmennt hafa meðal þjóðarinnar sem reyna allt sem þau geta til að grafa undan trúverðugleika kirkjunnar og iðkunar kristinnar trúar á opinberum vettvangi þjóðfélagsins. Þeirra æðsta viðmið er maðurinn og skynsemi hans, sem er mjög brigðul eins og sagan sýnir."

Sjá ræðuna í heild sinni á slóðinni http://tru.is/postilla/2009/3/lifid-fra-odru-sjonarhorni

Ég spyr hvort það sé ekki bara gott í lýðræðislegu samfélagi að ekki séu allir sammála og að við skiptumst á skoðunum? Ég get ekki séð neitt dapurt við það.

Hvað finnst ykkur kæru lesendur?

JB

Ung vinstri græn fá fullt hús stiga

Vel heppnuðum landsfundi Vinstrihreyfingarinnar græns framboðs lauk síðdegis í dag. Mörg góð mál voru tekin á dagskrá og var að fjöldi þeirra samþykktur. Ef svo fer að VG verður í ríkisstjórn eftir kosningar munum við sjá mikla breytingu til batnaðar á ýmsum sviðum þjóðfélagsins.

Eins og gengur og gerist í stórum og öflugum stjórnmálaflokki takast einstaklingar og hópar á málefnalega. Sjálfur hef ég aldrei samsamað mig einni "klíku" innan flokksins annarri fremur, en ég held að ég verði að viðurkenna að helst höfðaði kröftugur og málefnalegur málflutningur ungra vinstri grænna til mína á þessum landsfundi. Það er því full ástæða til þess að vekja athygli á síðunni þeirra www.vinstri.is

Ekki slæmt að vera ungur vinstri grænn í anda.

JB

Góð tillaga að ályktun frá UVG á landsfundi Vinstrihreyfingarinnar - græns framboðs

Ung vinstri græn koma með nokkrar metnaðarfullar og góðar tillögur að ályktunum á landsfundi VG sem nú stendur yfir. Ein er sú tillaga sem ég vil sérstaklega vekja athygli á og er hún þessi:

"Veraldleg lífsskoðunarfélög öðlist sömu lagalegu réttindi og trúarleg lífsskoðunarfélög."

Rökstuðningurinn sem fylgir tillögunni er þessi:

"Með núverandi löggjöf er lífsskoðunarfélögum gróflega mismunað eftir því hvort meðlimir þeirra trúa á yfirnáttúruleg fyrirbæri eður ei. Slíkt stenst ekki jafnræðisreglu stjórnarskrárinnar, en þar segir: "Allir skulu vera jafnir fyrir lögum og njóta mannréttinda án tillits til kynferðis, trúarbragða, skoðana, þjóðernisuppruna, kynþáttar, litarháttar, efnahags, ætternis og stöðu að öðru leyti.""

Nú er það líklega svo að ekki vita allir hvað lífskoðunarfélag er og hvert hlutverk slíks félags er. Hér á landi er starfandi eitt félag sem telst lífskoðunarfélag og heitir Siðmennt og verður það 20 ára á næsta ári. Hlutverk þess er m.a. að veita þá þjónustu og ráðgjöf til fólks sem ekki tilheyrir trúfélögum og er sambærileg þeirri þjónustu sem trúfélög veita sóknarbörnum sínum. Hér er um að ræða ýmsar athafnir s.s. giftingar, útfarir og nafngjafir auk þess að koma að félagslegum og tilfinningalegum stuðningi s.s. að bregðast við áföllum og sorg . 

Nú hefur það staðið í vegi fyrir því að félagið nái að sinna öllu því fólki sem kýs að standa utan trúfélagi að það hefur að mestu leyti verið rekið í sjálfboðavinnu. Fólk sem stendur utan trúfélaga hefur því ekki átt kost á sambærilegri þjónustu og þeir sem tilheyra trúfélögum. Hér er því um grófa mismunun að ræða sem ber að leiðrétta sem fyrst.

Nú ber að hafa það í huga að til þess að fá skráningu sem lífskoðunarfélag þarf að uppfylla ákveðin skilyrði um starfsemi og þjónustu til félagsmanna. Það er ekki hvaða félag sem er sem ætti að geta fengið slíka skráningu. Það sem skráning myndi breyta frá því sem nú er, er að félagsmenn myndu greiða sóknargjöld sín til félagsins í stað þess að greiða þau til Háskóla Íslands og þar með fælist sú skylda á herðum félagsins að veita þeim ákveðna þjónustu sem trúfélög veita safnaðarmeðlimum sínum.

Við höfum fyrirmynd að slíku fyrirkomulagi frá Noregi en frá árinu 1981 hefur norska félagið Human etisk forbund verið skráð sem lífskoðunarfélag og haft sömu réttindi og sömu skyldur og önnur trúfélög þar í landi. Árið 2008 voru meðlimir Human etisk forbund 75.000 talsins.

Eru einhver haldbær rök sem mæla gegn því að að lífskoðunarfélög fái skráningu til jafns á við trúfélög?

JB

séra Gunnar tekur til starfa við sérverkefni á biskupsstofu

Ég hef aldrei verið mikið fyrir spádóma og aldrei talið mig hafa spádómsgáfu. En einhvernveginn hef ég það á tilfinningunni að ég gæti kannski orðið ágætur spámaður og gaman gæti verið að spá fyrir fólki og atburðum. Ég ætla því að skella mér í spádómsmálin og fyrsti spádómur minn á vonandi löngum spádómsferli er sá að innan ekki svo margra vikna mun sóknarpresturinn Gunnar sem verið hefur í fréttum að undanförnu hætta að stýra söfnuði sínum á suðurlandi og taka til við störf að ýmsum "sérverkefnum" á biskupsstofu. Mér sýnist líka þegar ég rýni betur í spádóminn að þetta starf að "sérverkefnum" verði í boði íslenskra skattgreiðenda þrátt fyrir kreppuna.

Og nú er bara að bíða og sjá hvort að ég hafi í raun spámannshæfileika.

JB

Strokið, faðmað, þuklað og kysst. Er það framlag ríkiskirkjunnar til æskulýðsmála?

Hvers eiga börnin að gjalda? Ég er orðlaus.

JB

Sóknarprestur sýknaður