Mikið andsk. saknaði ég vinnunnar minnar. Eða hafa yfirvöld menntamála í Reykjavík ekkert annað að gera en vantreysta kennurum?

Reynsla mín undanfarin ár af yfirvöldum menntamála í borginni og annarsstaðar er sú að helst af öllu vilja þau að kennarar geri allt annað í vinnunni en að kenna unga fólkinu.

Þetta kom svo sannarlega á daginn í dag þegar alls fjórir, já ég endurtek fjórir fulltrúar frá borginni komu til okkar í Réttarholtsskóla og stálu frá okkur einni klukkustund í vinnu til að segja okkur það að framvegis verðum við að stimpla okkur inn og út í tíma og ótíma. Og þetta er víst ekki svona stimpilklukka eins og var í Hraðfrystihúsi Keflavíkur þegar ég var að alast upp þar sem fólk smellti svona pappír í klukku og fékk stimpil. Nei þetta er svona stimpilklukka þannig að maður getur stimplað sig inn og út hvar sem er og hvenær sem er í gegnum tölvu og síma og ég veit ekki hvað.

Í vetur er ég svo lánsamur að fá að kenna alls 8 kennslustundir í heimspeki, en heimspekin er mitt helsta áhugamál. Réttarholtsskóli er eini skólinn sem hefur heimspeki sem skyldufag í 8. bekk og svo eru tveir hópar í 10. bekk sem hafa valið greinina, þannig að það verður mikið fjör í heimspekinni í vetur. Á meðan þessi fjórir, já ég endurtek fjórir fulltrúar frá Reykjavíkurborg (já ég endurtek fjórir þvílíkt bruðl) voru að predika fagnaðarerindið þá var ég með hugann við heimspekikennsluna sem fram undan er. Þetta er bara gjörsamlega óþolandi þegar pólitíkusar í menntaráði og embættishvuttarnir þeirra vantreysta okkkur kennurum svo mikið að þeir geta ekki séð okkur í friði til að vinna vinnuna okkar. Og svo hótuðu þessir fjórir fulltrúar, já ég endurtek fjórir að koma aftur og taka hvern og einn starfsmann í einkakennslu til að stimpla sig inn og út. Hvað er að þessu liði?

Við menntaráð Reykjavíkur segi ég bara "fokk jú" leyfið okkur að vinna vinnuna okkar í friði og í stað þess að vera að flækja okkur í einhverju bulli ættuð þið fulltrúar ráðsins að hætta að vantreysta okkur kennurum og koma ykkur hingað í skólann og sjá að við erum að vinna.

Ykkur menntaráðsfulltrúum er því hér með boðið að koma og sitja hjá mér í tímum þegar kennsla er hafin svo þið fáið nú smá hugmynd um hvað er að gerast í skólunum.

Við þurfum ekkert meira bull frá stjórnmálamönnum, við þurfum frið til að vinna vinnuna okkar.

JB

Athugasemdir

[Bjarni Jónsson (IP-tala skráð) 17.8.2009 kl. 21:44]

Ertu viss um að þeir voru fjórir? Tek undir með þér Jóhann. Hvað á þetta að fyrirstilla? Er verið að mæla þann tíma sem þú ert í vinnu? Er verið að undirbúa afkasta hvetjandi launakerfi (ef þú kennir 25 hausum færðu meira en að kenna 20).

Í alvöru þá er það ótrúlegt að slíkt sé að gerast. Hingað til hefur það verið fljótt að spyrjast út ef kennarar eru að slóðast í vinnunni. Legg síðan til að fulltrúarnir fjórir og þeirra kumpánar samþykki gott boð þitt um að sitja í tíma hjá þér - það veitir ekki af!

[Jón Ólafur Vilhjálmsson, 17.8.2009 kl. 22:26]

Það  er sjálfsagt að nota stimpilklukkur þær gera ekki annað en að seigja til um hvað maður er að gera ég hef verið á vinnumarkaði frá 1970 og alltaf notað stimpilklukku til að skrá minn vinnutíma og það er ekkert  að því þannig hafa fleiri þúsund mans haft sínar skráningar.

Vertu bara feginn að geta sýnt fram á hvað þú vinnur mikið.

[Svanborg (IP-tala skráð) 18.8.2009 kl. 00:14]

Já en þurfti 4 til að kynna þetta?

[Arnar (IP-tala skráð) 18.8.2009 kl. 10:21]

Jón, stimpilklukkur segja nákvæmlega ekkert til um það hvað maður er að gera eða hver afköstin eru! Eða hvernig eiga þær að fara að því?

[orn (IP-tala skráð) 20.8.2009 kl. 09:24]

heldur finnst mér þetta ódýrt.  Að sama skapi mætti segja að punktakerfi í skólum til að halda utan um ástundun og mætingu nemenda væri óþörf. Jú við hljótum að geta treyst þeim eða höfum við ástæðu til annars.

Notkun stimpilklukka er viðurkennd aðferð til að halda utan um og skrá viðveru starfsmanna. Sá kostur fylgir henni henni að rafræn stimpilklukka auðveldar til muna, bæði vinnu og eykur áreiðanleika við útreikning og frágang launa.

Það er sjálfsagt mál að atvinnurekandi geti fylgst með viðveru og ástundun starfsmanna sinna.  Kennarar eru ekki yfir það hafnir. Stimpilklukka segir auðvitað ekkert til um hvað viðkomandi er að gera og hvernig enda er það hlutverk stjórnanda starfsmanns að fylgjast með því...eða á kannski stjórnandinn heldur ekki rétt að að fylgjast með hvort starfsmaðurinn standi...hann eigi bara að treysta því að hann vinni starf sitt vel.  Þetta er barnaleg nálgun og lýsir ákveðnum hroka. Svo ég tali nú ekki um að þú ert á launum hjá hinu opinbera en þar er almennt viðurkennt að allavega ekki síðri kröfur eru gerðar til starfsmanna en á einkamarkaðinum þar sem jú þú ert á launum okkar allra (og sjálfum þér auðvitað)

Hættu að eyða tíma þínum í þetta, stimplaðu þig inn og farðu að vinna.  Athugasemd þín hinsvegar um að 4 starfsmenn þurfti til að kynna þetta er gild og málefnaleg.  Viðkomandi aðilar sem stýrðu þessu verkefni verða að svara fyrir það.

[Þórður (IP-tala skráð) 20.8.2009 kl. 13:17]

Það er fernt sem er algert bull við þessar stiimpilklukkur:

1. Vinnutími langflestra kennara er meiri en vinnuskýrslan segir til um. Málið er það að ef þú mætir ekki undirbúinn í tíma geturu ekki kennt og nemendur taka eftir strax og slíkt fréttist. til þess að vera undirbúinn þarf að vera á hreinu hvað á að kenna í tímanum, búa til verkefni, fara yfir verkefni o.s.frv.  Þessi klukka mælir það ekki, bara hvort þú ert á staðnum þegar þú átt að vera að vinna.  Ekkert fæst fyrir aukavinnu fram yfir það sem vinnuskýrslan kveður á um, ekki ein króna.

2. Á venjulegri skrifstofu þar sem e.t.v. vinna minni 20-30 manns er lítið mál að koma alltaf 10-15 mínútum of seint og fara 20 mínútur of snemma og taka sér langan hádegismat.  Í skólum byrja tímar hins vega kl 8.00 og ef þú ert að koma 15 mínútum of seint eru milli 20-25 nemendur að bíða eftir þér. það er því erfitt að "stunda" það að koma of seint til vinnu.

3. Í síðustu eða þarsíðustu samningum var sérstaklega talað um það að gera kennurum auðveldara að vinna undirbúningsvinnuna heima við, t.d. fá kennarar í Reykjavík diska til að setja upp Office pakkan í sínum heimatölvum. Að setja upp þetta kerfi vinnur beint gegn þessu kerfi. mér þykir t.d. mun betra að gera þetta heima hjá mér á kvöldin þegar strákurinn er sofnaður og geta verið meira með honum yfir daginn

4. Hvað kostar að koma þessu kerfi upp? Sérstaklega á þessum tímum þegar verið er að skera þvílíkt niður í menntakerfinu að enginn veit hvernig vorönnin verður, hvort meira verði skorið þá niður, bekkir sameinaðir, má ekki kaupa þetta og hitt o.s.fr. 

Ég held að þeir sem stugu upp á þessu kerfi sé sama fólkið og lét setja upp miðakerfið í sundlaugunum, í annað sinn eftir að fyrri tilraun mislukkaðist. Þeir þurfa að sýna fram á að þeir séu að vinna eitthvað...Þetta miðakerfi var fyrist sett upp fyrir nokkrum árum á sama tíma og strætó ætlaði að taka upp smartkortakerfið. Sundlaugahlutinn kostaði þá um 2-300 milljónir að mig minnir og kostaði um 6 milljónir á hverja sundlaug í Reykjavík núna í vor að setja þetta í gang aftur, fyrir utan rekstrakostnaðinn...

Ég hefði ekkert á móti því að nota stimpilklukku ef ég væri í 9-4 vinnu sem gæti samviskulaus farið úr kl 4 og vitað það að ef ég gæti ekki klárað eitthvað í dag myndi ég klára það á morgun. Kennarastarfið býður því miður ekki upp á það.

[Björn (IP-tala skráð) 21.8.2009 kl. 22:16]

Örn: Ef nemendur mæta illa í skólann eða stunda ekki nám sitt á að sjálfsögðu að taka á kennarinn að taka hverju tilfelli fyrir sig eins og það kemur fyrir og leita úrlausna í samráði við nemandann og foreldra hans. Kennarar hljóta að hafa yfirsýn yfir þessa hluti og eiga að vera reiðubúnir að finna lausnir á þeim frekar en að gefa nemendum refsistig þegar þeir standa sig ekki.

Að sama skapi hljóta skólastjórnendur að hafa nægilega yfirsýn yfir mætingar og afköst starfsmanna sinna til að geta tekið á málum þeirra sem ekki sinna vinnu sinni sem skyldi. 

Stimpilklukkur og punktakerfi eru úr sér gengin og óþörf fyrirbæri í nútíma skólastarfi.

[Tómas Þráinsson, 21.8.2009 kl. 23:53]

Þvílík endemis vitleysa er þetta eiginlega? Hvað er svo næst, ríkisstimpilklukka til að fylgjast með því hvenær borgararnir aulast á lappir á morgnana og svo í bælið á kvöldin??

Þeir sem halda að stimpilklukkuvæðing skólanna komi til með að vera nothæfur mælikvarði á gæði kennslunnar, ættu að skoða hvernig vinna kennarans dreifist yfir sólarhringinn. Kennari er ekki verksmiðjustarfsmaður og ætti ekki að vera metinn á sama hátt fyrir vinnu sína. Það ætti eingöngu að meta hann út frá þeim árangri sem nemendur hans ná, þ.e. framfarir þeirra.

[Minerva M Haraldsdóttir (IP-tala skráð) 22.8.2009 kl. 14:36]

Halló !

Ég vinn við tónlistarskóla þar sem þetta Tímon kerfi hefur verið notað í nokkur ár og get fullyrt það, að það eina sem þessi stimpilklukka gerir er að skapa meiri vinnu og stress fyrir kennara og þá sem þurfa að fara yfir stimplanir dagsins.  Þetta skapar þá líka tilfinningu að vera ekki treyst til að vinna vinnuna sína.  Vinna tónlistarkennarans er mjög sveigjanleg og eilíft verið að færa til tíma vegna skólastarfs, íþrótta og breyttrar stundaskrár.  Kennari fer e.t.v. hálftíma fyrr heim v/ veikinda nemanda o.fl. o.fl. Þá þarf kennarinn næstum daglega að setjast niður við tölvuna og skrifa útskýringar á athugasemdasíðu Tímons. Stjórnandi eyðir síðan tugum og hundruðum klukkustunda í að fara yfir og samþykkja þessar breytingar.  Kennarinn undirbýr sig auðvitað mikið til heima í næði, oft á kvöldin, leitar að námsefni og ítarefni hvar sem hann getur grúskað það upp til að nota í kennsluna.  Kennarinn er líka mjög oft að hringja heiman að frá sér á kvöldin til að hafa samband við foreldra o.fl.  Þessa vinnu mælir Tímon ekki.  Þegar mikil viðvera er hjá kennara í kringum álagstímabil þá er það aldrei metið til launa eins og var í gamla stimpilkerfinu. Þá var sá sem mætti snemma og fór seint alltaf að búa sér til yfirvinnustubba sem söfnuðust saman í launaumslaginu. Þetta tTímon-kerfi er rándýrt og engum til hagsbóta nema skrifstofublókum sem hafa ekkert að gera og auðvitað þeim sem eru að selja þetta rugl inn í skólana. BURT MEÐ TÍMON !!!