Páll Óskar sýnir kung fu

Ekki verður annað sagt en að Páll Óskar sé núþegar búinn að bjarga deginum. Ég las það í Fréttablaðinu í morgun að hann ætlar að bjóða upp á alvöru kung fu kvikmyndaveislu í Bæjarbíói 2. október kl. 21.00.

Allt frá því ég laumaði mér sem barn inn í Félagsbíó í Keflavík á rosa kínverska kung fu mynd bannaða börnum þar sem mannskapurinn krækti með berum höndum í augu og ýmis líffæri auk þess að sparka harkalega í punga hef ég bara ekki verið samur maður. Kung fu dellan heltók mig og hefur ekki sleppt mér síðan. Ég hef að vísu farið ansi hljótt með þessa dellu og horft á kung fu myndirnar í laumi þar sem fólk í kringum mig hefur ítrekað sagt mér hversu ógeðslega hallærislegar þessar myndir eru. Og ég hélt að ég væri eini kung fu myndadellugæinn í landinu. Þangað til Palli boðar til kvikmyndasýningarinnar góðu.

Frábært framtak.

JB

Athugasemdir

[Didda (Guðbjörg Kristín Eiríksdóttir) (IP-tala skráð) 25.9.2008 kl. 13:01]

Já, nú er ég hissa! Ekki hefði ég nú tengt þig við kung fu. En fyrst þú ert nú að "outa" þig, viðurkenni ég hér með að hafa verið mikill aðdáandi leikarans David Carradine í sjónvarpsþáttunum "Kung fu" sem ég naut í kanasjónvarpinu í den, þegar ég bjó í Grænási.

Fyrir þá sem ekki vita, þá voru 3 blokkir Grænáss lengi vel innan vallargirðingar. Við krakkar sem þar bjuggu, gátum séð kanasjónvarpið mjög vel og einstaka þorði að fara í bíó á vellinum. Flest okkar fóru svo á hrekkjavöku á milli húsa ameríkananna, það sást jú engin munur á íslenskum krökkum í grímubúningi og þeim amerísku!

Góða skemmtun í Félagsbíó!