Jerúsalemheilkennið

Núna um jólin bárust fregnir af Jerúsalemheilkenninu svokallaða. Kunningi minn sendi mér eftirfarandi frétt af þessu undarlega heilkenni:

"Í Jerúsalem er lögreglan með sérstaka vakt sem sér um ferðamenn sem ár hvert koma til Jerúsalem með svokallað Jerúsalem-heilkenni.
Þetta er mest áberandi á jólunum og af einhverri ástæðu eru það aðallega ferðamenn frá smábæjum í Skandinavíu og Bandaríkjunum sem fá "Jerúsalem-heilkennið".

Það hefur gengið á ýmsu gegnum tíðina, til dæmis gekk sextug kona fyrir nokkrum árum níu kílómetra leið um miðja nótt og fannst næsta morgun í Betlehem, við gröf Rakelar. Hún mundi ekkert frá nóttinni, aðeins að hún hafði fengið teikn á hótelherberginu kvöldið áður.

Í annað skipti hélt kona sem var á ferð með kristnum hópi að hún væri María mey. Sveipuð hvítu laki gekk hún af stað frá hótelinu og hóf að predika að fólk ætti að hætta að syndga.

Þetta hljómar kannski eins og eitthvað sem er í versta falli broslegt, en í Jerúsalem líta yfirvöld á það sem alvarlegt vandamál að ferðamenn séu á ferli á næturnar og hagi sér undarlega. Þess vegna er sérstök lögreglusveit sem sér um þennan þátt löggæslunnar.

"Þetta er langverst um jól og páska," segir Victor Wadhawkar, sem nú er kominn á eftirlaun, en starfaði í fjórtán ár með sérsveitinni. Sérsveitin fær að meðaltali eitt Jerúsalem-tilfelli á mánuði, en á hverju ári eru 30-40 einstaklingar lagðir inn á sjúkrahús með þetta sérkennilega syndróm.
"Þetta er frekar sjaldgæft og Jerúsalem-syndrómið er ekki alvöru nema viðkomandi hafi aldrei áður þjáðst af geðröskunum. Helst gerist þetta í fyrsta skipti sem fólk heimsækir landið helga," segir Gregory Katz, yfirlæknir á Givat Shaul Mental-sjúkrahúsinu.

Þó það sé þekkt aftur til miðalda að pílagrímar sjái sýnir og breyti hegðun sinni í Jerúsalem eru þeir til sem halda því fram að Jerúsalem-syndrómið sé alltaf hluti af geðsjúkdómi sem viðkomandi þjáðist af fyrir.

Gregory Katz segir þetta hinsvegar óháð öllu öðru og árið 2000 birtist í hinu virta tímariti British Journal of Psychiatry grein eftir Katz um þetta ástand.
Þar segir hann meðal annars frá því hvernig sjúklingarnir verði haldnir þvottaáráttu og finni fyrir knýjandi þörf til að syngja sálma."

Nú er bara spurning hvort einhver hafi skýringu á þessu undarlega heilkenni?

JB

 

Athugasemdir

[Ár & síð, 30.12.2007 kl. 16:15]

Eru þessi viðbrögð lögreglunnar kannski ein ástæða þess að Jesús hefur enn ekki lagt í að snúa til baka?

[Vilhjálmur Örn Vilhjálmsson, 30.12.2007 kl. 16:24]

Eru Þetta ekki trúleysingjar og vantrúarfólk sem skyndilega fá andann yfir sig í heilagri borg.

Ég sá eitt sinn svona "Jesús" árið 2001 í Jerúsalem og á einhvers staðar ljósmynd af honum. Það var ljóshærður Jesús. Mér varð um og ó. Maðurinn lét svo illa. Svo komu einhverjar nunnur og vildu róa hann. Þá sagði kauði: "Oh, I am sooo happy to see you, my sisters". Þegar ég fjarlægðist þennan mann, sá ég tvo lögreglumenn koma á hlaupum.

[Sigurður Þórðarson, 30.12.2007 kl. 19:05]

Það eru alltaf að koma fram nýir og nýjir "Jesúsar" eða menn sem telja sig gegna svipuðu hlutverki og hann. Sjálfur kynntist ég vel einum slíkum hér á klakanum, Dr. Benjamín Eiríkssyni, miklum prýðismanni.  En því miður, eiga flestir þeirra það sameiginlegt, að vera ofsóttir og síðan drepnir, reyndar eins og Orginallinn.

[Kristján Sigurður Kristjánsson, 30.12.2007 kl. 20:02]

Ég sá svona heilkenni í sjónvarpinu áðan í beinni útsendingu hjá Agli. Þar þrætti ljóshærð kona fyrir þátt Sjálfstæðisflokksins í REYmálinu.

[Þorsteinn Siglaugsson, 30.12.2007 kl. 22:55]

Carl Jung, sálfræðingurinn frægi, segir frá því í einni bók sinni að hann hafi aldrei treyst sér til að ferðast til Rómar vegna ótta um að ganga af vitinu þegar hann kæmist í snertingu við undiröldu sögunnar. Þú ættir kannski að leita til hans eftir skýringum.

[Sævar Finnbogason, 31.12.2007 kl. 02:08]

Ég lendi líka alltaf í Horas-heilkenninu þegar ég er í Egyptalandi 25 desember og enda rammvilltur í píramíta.

þetta tengist eitthvað afstöðu himintungla er mér sagt ;)

[Jón Steinar Ragnarsson, 31.12.2007 kl. 08:45]

Það er einnig mjög algengt að fólk, sem fer yfir um á sýru eða öðrum hugbreytandi efnum, verði Jesúsar. Man eftir einum Skólabróður í MHÍ sem skynndilega var kominn á sandala niður á hlemm og farinn að blessa fólk, hægri vinstri. Ég held að hann sé enn í karakter 30 árum síðar.

[Morten Lange, 31.12.2007 kl. 11:59]

Ansi áhugavert ! 

Google fann  Reuters-grein úr Scientific American um þetta heilkenni og þar er meir að segja smá umræða.  Gagnrýnisröððin og Google leiddi mér svo til Wikipediu. Þar er ágætis grein um þetta og niðurstaðan virðist vera að þetta heilkenni sennilega komi öðru fremur fram hjá þeim sem eru eða hafa verið veikir fyrir. 

Íslenski textinn hér að ofan virðist  koma frá vefsetrinu eyjan.is