Börnin borga en fullorðnir fá frítt

Ég var á Ljósanótt, bæjarhátíð Reykjanesbæjar í gær. Prýðilega var staðið að flestum hlutum en eitt vakti athygli mína og er í sjálfu sér ekki ný saga hér á landi.

Það sem vekur athygli mína er þetta: Þar sem skemmtanir eins og 17. júní hátíðahöldin, Ljósanótt eða eitthvað annað er í gangi eru skemmtiatriðin sem höfða til fullorðan fólksins ávallt ókeypis en það sem hefur mest skemmtigildi fyrir börnin þarf að greiða fyrir dýrum dómi.

Fullorðnir geta því skemmt sér hömlulaust og þurfa ekki að greiða krónu fyrir að hlusta á Halla og Ladda og Ragga Bjarna og Ómar Ragnarsson og Magna og hvað þeir heita nú allir þessir útiskemmtanaskemmtikraftar en börnin sem kæra sig kollótt um slíkt gengi og vilja skemmta sér með einhverju hoppi þurfa að rækta með sér gríðarlegan sjálfsaga og velja og hafna og hafa hemil á löngunum sínum eða kannski í sumum tilvikum að neita sér um þá skemmtun sem þau helst kysu. (Það eru nefnilega ekki allir pabbar eða allar mömmur sem fá 50 ára verkamannalaun á mánuði eins og einn ágætur maður).

Þetta er bara súrt.

JB

Athugasemdir

[Gunnar Th. (IP-tala skráð) 2.9.2007 kl. 18:35]

Þetta vil ég taka heilshugar undir. Held að þeir séu færri en fleiri sem hafa gert sér grein fyrir þessu á þennan hátt. Afar góður punktur. G. Th.

[Jóna (IP-tala skráð) 2.9.2007 kl. 23:28]

Ég hef aldrei hugsað þetta svona!!  En einmitt pirrað mig á því peningaplotti sem er á svona hátíðum.  Takk fyrir að benda mér á þetta samhengi.

[Bjarni Valur Guðmundsson (IP-tala skráð) 3.9.2007 kl. 17:35]

Mér finnst líka mjög ósanngjarnt að börn þurfi að borga í strætó í Reykjavík en námsmenn fái frítt.