Að kenna á konuna sína

29.8.2007 | 20:55

Ég hef áhuga á því sem oft er kallað heimspeki hversdagsleikans. Það er að segja að velta upp heimspekilegum hliðum á hversdagslegum hlutum. Í því samhengi eru fjölmiðlar mikill fjársjóður og endalaus uppspretta pælinga.

Í dag hef ég verið alveg viðþolslaus og mjög utanvið mig vegna fyrirsaganar í blaðinu þar sem rætt er við Þorgrím Þráinsson. Þorgrímur er að vinna að bók um samskipti kynjanna og er ekkert nema gott um það að segja. Hinsvegar er fyrirsögn fréttarinnar þessi:

"Kennir karlmönnum á konuna sína"

Nú hef ég í allan dag verið að reyna að skilja þessa fyrirsögn og pælt og kafað og þvælt í eigin heilabúi. Spurningin er nefnilega sú hvort Þorgrímur er að kenna öðrum karlmönnum á konuna sína? Eða með öðrum orðum, eru aðrir karlmenn að læra á konuna hans Þorgríms? Kannski er þetta spurning um slakan málskilning hjá mér enda ætla ég að ráðfæra mig við einhvern íslenskukennara í Réttó á morgun og reyna að fá íslenskuna á hreint áður en ég held áfram að fílósófera með þessa kennslustund Þorgríms og konunnar umræddu.

Flokkur: Stjórnmál og samfélag | Breytt s.d. kl. 20:58 | Facebook

Athugasemdir

Ætti ekki að standa : hann kennir öðrum karlmönnum á konurnar sínar, margir menn á margar konur, það hlýtur að vera betra mál, annars er ég enginn fræðingur og það mætti þá gjarnan leiðrétta mig ef vill.

Skarfurinn, 29.8.2007 kl. 21:16

Kennir karlmönnum á konurnar þeirra?????

Ekki vill hann kenna þeim öllum á sína konu?

Katrín Snæhólm Baldursdóttir, 29.8.2007 kl. 21:31

Fegin er ég að sjá að það er ekki bara ég sem hef verið að velta þessari "frétt" fyrir mér í dag. Það kom upp umræða á heimilinu um það hvernig þeir Spaugstofumenn hefðu getað gert sér mat úr þessu.