Belgískur stinningarvandi, "ánægjuleg" líknardráp og tafla og krít

Ég er nýkominn heim eftir stutta heimsókn til Belgíu. Belgía er skemmtilegt land að sækja heim og hef ég um helgina verið að blaða í belgískum dagblöðum sem ég tók með mér heim. Þar eru ýmsar athyglisverðar fréttir úr belgísku samfélagi eins og t.d. sú að lífsgæði fjölda belgískra karlmanna er ekki eins og best verður á kosið. Ástæðan er sú að einn af hverjum þremur karlmönnum sem eru eldri en 40 ára eiga við stinngarvanda að etja. Og segir í fréttinni að þetta sé alvarlegur þáttur í því að rýra lífsgæði mannanna. (ekki veit ég hvort staðan hér á landi er betri eða verri).Einnig er frétt í sama blaði þar sem sagt er frá því að æ fleiri belgar eru sáttir við það að líknardráp séu lögleg í landinu að uppfylltum ákveðnum skilyrðum. En belgar samþykktu lög árið 2002 þess efnis að líknardráp yrðu lögleg að ákveðnum skilyrðum uppfylltum. Eins og gefur að skilja var sú ákvörðun mjög umdeild en nú segir samkvæmt nýlegri könnun að æ fleiri eru eru sáttir við þessa ákvörðun.Ég fór líka til Leuven og heimsótti gamla háskólann sem ég stundaði nám í fyrir 12 árum. Það vakti athygli mína að ekkert í skólanum hefur breyst. Kennslustofurnar eru alveg eins og þá er ég að meina að þeir þarna í heimspekideildinni hafa ekki séð ástæðu til þess að tölvuvæða og páverpoíntsjóva kennsluna eins og algengt er orðið hér á landi. Þar er kennarinn, hið talaða orð og krítin sem blífur enn eins og áður. Mér varð hugsað til þessarar heimsóknar minnar í þennan háskóla sem hefur verið talinn með þeim betri á meginlandinu þegar ég las Fréttablaðið í morgun en þar sagði skólameistari MA (að því er virtist frekar fýldur á svip) "Það er er hins vegar farið að há okkur við þessa þróunarvinnu að fjárveiting til kennslu miðast við að það séu að lágmarki 25 nemendur í hópi og einn kennari, tafla og krít. Í fjárveitingunni er ekki gert ráð fyrir tölvum eða neinum öðrum nútíma í kennsluháttum". Ekki væri sá hinn sami til í að starfa við heimspekideildina í KU Leuven ef marka má þessi orð hans. En þrátt fyrir tölvuleysið og þrátt fyrir mjög mikið magn af krítum og fínar krítartöflur þá hefur sú deild skarað frammúr á sínu sviði. Mekilegt nokk hvað hægt er að gera í tölvuleysinu.Ég var svo lánsamur að lenda í Belgíu á kjördag. Meira um belgíska pólitík á morgun.JB

Athugasemdir

[Guðmundur Brynjólfsson (IP-tala skráð) 18.6.2007 kl. 23:18]

Blessaður Jói

 Gott innlegg hjá þér og góð ábending hvað varðar móderníseringuna alla og hvernig menn halda að kennsla og/eða akademísk gæði þurfi endilega að fylgja tölvufjölda og tæknifargani eftir.

Svo er það þetta sem þessi - vafalaust ágæti - skólameistari í MA impraði á; að gera skólann að einkaskóla! Já, þannig segja fjölmiðlar amk. frá þessari ræðu hans, ég var ekki þar og hef því mitt vit þaðan.

En er þessi maður að tala um einkaskóla? Nei - ekki frekar en aðrir þeir sem gapa mest um einkaskóla hérlendis. Það á nefnilega að fara í "hinn" vasann hjá ríkinu eftir aurunum. Það er aumkunarverð þessi einkaskóla umræða hér, ekki nokkur aðili (verslunarráð eða hvað það heitir nú allt) þorir að reka einkaskóla nema að nafninu til, allt þetta lið sem í sífellu rakkar niður ríkisrekstur hefur vart sleppt orðinu þegar það bankar á kistulokið hjá fjármálaráðherra og biður um aur til að reka "einkaskóla".

Sorrý - þetta átti bara að vera stutt athugasemd en varð eiginlega færsla - etv. einkafærsla á annara vegum:)?