Hvernig geta fóstureyðingar verið synd ef kynferðisleg misnotkun er það ekki?

Manni finnst nú eins og það sé að bera í bakkafullann lækinn að fara að nefna bullið í Byrginu eina ferðina enn. En reyndin er nú sú að það virðist ekkert lát vera á subbuganginum sem fram er að koma og í ljósi aðstæðna þá get ég ekki komist hjá að nefna örfá atriði.

Fram hefur komið að starfsmenn misnotuðu aðstöðu sína grimmt og stunduðu kynferðislega misbeitingu af miklu kappi með vistmönnum Byrgisins. Það er eitt. Annað er að þeim konum sem urðu barnshafandi var bannað að fara í fóstureyðingu ef þær svo vildu, enda talið brjóta gegn kærleiksboðskap trúarinnar sem þarna átti að vera unnið eftir. Maður deyðir ekki fóstur segja þeir en hinsvegar má maður samkvæmt öllu misnota skjólstæðinga kynferðislega.

Í þriðja lagi voru viðbrögð við þungunum þau að þau sem í hlut áttu urðu að trúlofa sig eða eins og segir orðrét í frétt DV: "Yfirleitt var fólk látið trúlofa sig þegar þetta gerðist (þungun innsk JB) því annað væri synd, það væri synd að búa saman ólofuð. Þá var fólki skaffaður bústaður eða það gat búið saman."

Ég tek eftir orðalaginu hér að sögnin að láta er notuð í samhenginu að fólk var látið búa saman. Skyldi það hafa verið spurt?  Ég bara spyr í ljósi nauðungarhjónabanda sem tíðkast víst víðsvegar um heiminn.

Mál þetta er eiginlega of fjarstæðukennt allt saman til þess að ég geti áttað mig á þessu og eru hugmyndirnar um syndina ekki til þess að auðvelda skilning minn á því. En ætli þetta mál sé ekki bara til vitnis um það að vitsmunalíf manneskjunnar er ekki eins langt komið og við höfum viljað halda fram ? Hver veit?

JB 

 

Athugasemdir

[Jón Valur Jensson, 12.2.2007 kl. 13:26]

Hvort tveggja er synd, kynferðisleg misnotkun og fósturdeyðing. Þetta áttirðu að vita, Jóhann, sem og hitt, að menn bæta ekki fyrir eina synd með því að drýgja aðra. Hitt er algengt, að þeir, sem fremja alvarlegar syndir, drýgi aðrar (svo sem lygar, ógnanir eða annað verra) til að hylma yfir sína fyrri synd. Allt er það ferli harla ógeðfellt, og sízt er það t.d. fagurt að breiða yfir framhjáhald með fósturdeyðingu -- og þá ekkert frekar að reyna að fela kynferðislega misnotkun af greindu tagi með því að þrýsta stúlkunni til fósturdeyðingar.